2023 жылдың 15-16 тамызы күндері Сүлеймен Демирел атындағы университеті (Алматы облысы, Қаскелең қаласы) базасында Қазақстан Республикасының Оқу-ағарту министрлігінің «Дарын» республикалық ғылыми-практикалық орталығы мамандандырылған білім беру ұйымдары қызметкерлеріне арналған «Өзгеріске толы әлемдегі дарынды балаларға арналған білім беру кеңістігінің миссиясы мен құндылықтары» тамыз педагогикалық кеңесін өткізді.
Шараның мақсаты – дарынды балаларды оқыту, тәрбиелеу процесінің сапасын арттырудың перспективалық тәжірибесін дамыту, сондай-ақ, өскелең ұрпақты тәрбиелеудегі басым құндылықтарды анықтау.
Педагогикалық конференция жұмысына аймақтық «Дарын» орталықтарының басшылары, мамандандырылған білім беру ұйымдарының директорлары, директордың орынбасарлары қатысты.
Конференцияның бірінші күні қатысушылар үшін: «Әлем – дарынды балалар көзімен» фотогалереясы, пленарлық отырыс, панельдік сессиялар, республика мен облыстардың инновациялық идеялар панорамасы, «Біздің күшіміз – бірлікте!» педагогикалық қонақжай ұйымдастырылды.
Ағымдағы жылдың 16 тамызы күні «Дарын-25» конференциясы «Дарынның дара жолы» видеофильмінің көрсетілімімен ашылды. Қатысушыларға құттықтау сөздерін: педагогика саласының еңбек ардагері –Битуова Тілдаш Рысқұлбекқызы, Сүлеймен Демирел атындағы университеттіңректоры –Игенбаев Әлімжан Бекежанұлы арнады.Сонымен қатар, пленарлық отырыста «Дарын» республикалық ғылыми-практикалық орталығының директоры Тұрсынов Ғаждембек Қуанышұлы баяндама оқыды.
Конференцияның салтанатты бөлімінде «Ең үздік мамандандырылған білім беру ұйымы – 2023 жыл», «Олимп шыңын бағындырған», «Үздік директор –2023» Республикалық байқауларының қорытындысы жарияланды.
Нәтижесінде «Ең үздік мамандандырылған білім беру ұйымы – 2023 жыл» номинациясымен Өскемен қаласындағы Шығыс Қазақстан облыстық дарынды балаларға арналған мамандандырылған «БІЛІМ-ИННОВАЦИЯ» лицейі және дарынды балаларға арналған валеологиялық мамандандырылған мектеп-кешенi марапатталды.
Сапалы білім мен саналы тәрбие беруде қосқан зор үлесі үшін Қазақстан Республикасының Оқу-ағарту министрлігінің Құрмет грамотасымен ДпҚББД ШҚ ҒӘ «Дарын» орталығының директоры Рахимжанова Гаухар Болатбекқызы, дарынды балаларға арналған Жамбыл атындағы облыстық мамандандырылған мектеп-гимназия-интернатының директоры Ушакбаев Жанбол Каирдинович, Қазақстан Республикасының Оқу-ағарту министрлігінің алғыс хатымен облыстық мамандандырылған ІТ-мектеп-лицейінің директоры Савинова Людмила Николаевна марапатталды.
Конференцияның барлық қатысушыларына мерейтойлық төсбелгілер табысталды.
