2025 жылдың 7 — 16 шілдесі аралығында Беларусь Республикасындағы «Зубрёнок» ұлттық балалар білім беру-сауықтыру орталығында Ұлы Отан соғысы Жеңісінің 80 жылдығына арналған «Достастықтың балалары» халықаралық мәдени-білім беру форумы өтті.

Форумның мақсаты — жастар арасында мәдениетаралық байланыстарды нығайту және патриотизмді тәрбиелеу.

Форумға Армения, Беларусь, Қазақстан, Қырғызстан, Ресей, Тәжікстан, Түрікменстан және Өзбекстан елдерінен барлығы 80 бала жиналды. Аталған іс-шараға Шығыс Қазақстан облысынан 5 оқушы қатысты.

Қазақстан Республикасы күні форумға қатысушылар үшін ерекше болды — оларды бай мәдени-білім беру бағдарламасы күтіп тұрды. «Достастықтың балалары» форумында қазақстандық делегация өз елінің мәдениеті туралы айтып, ұлттық киіммен халық әндері мен билерін орындады. Көрермендерді әсем би ырғақтары мен көз тартарлық костюмдер тәнті етті. Делегация мүшелері өз өнерлерін мақтанышпен көрсетіп, қазақ халқының болмысын шынайы түрде жеткізе білді. Қазақстан кеші халықтар арасындағы мәдениеттің өзара түсіністік пен достықты нығайтатын сенімді көпір екенін тағы бір мәрте дәлелдеді.

Форум қатысушыларға ұмытылмас әсер қалдырды және елдер арасындағы достықты нығайтты.